Ծնվել է 1952  թվականին Սյունիքի մարզի Սիսիանի շրջանի նախկին  Բազարչայ գյուղում: 1969 թվականին տեղափոխվել և մինչ օրս բնակվում է  Ջերմուկ  քաղաքում: Ավարտել է  Ջերմուկի թիվ 1 միջնակարգ դպրոցը: 1970-1975 թ.թ. սովորել է Երևանի Խ. Աբովյանի անվան հայկական պետական մանկավարժական ինստիտուտի մշակույթի ֆակուլտետում և ձեռք բերել մատենագետ -գրադարանագետի մասնագիտություն: Ուսմանը զուգընթաց  երկու տարի աշխատել է դպրոցում, այնուհետև մինչև 2012 թվականը զբաղեցրել է Ջերմուկի քաղաքապետարանի աշխատակազմի քարտուղարի պաշտոնը: Իր դիմումի համաձայն տեղափոխվել է քաղաքային գրադարան և մինչև օրս այդ գրադարանի տնօրենն է: Գրել սկսել է պատանեկան տարիներից, տպագրվել է շրջանային թերթում: Սակայն քաղաքապետարանում լարված աշխատանքը և ընտանեկան հոգսերը նրան մոտ քառասուն տարի հետ են պահել ստեղծագործելու մտադրություններից: 2012 թվականին մեկը մյուսի հետևից գրել է առաջին յոթ հեքիաթները և հրատարակել: Այդ հեքիաթների գիրքը հասցեագրված է կրտսեր տարիքի երեխաներին:  Գրքի ձևավորումը և նկարազարդումները կատարել  է անձամբ: Ունի նաև անտիպ հեքիաթներ,  50-ից ավելի մանկական բանաստեղծություններ, բազմաթիվ մանրապատումներ,  հոդվածներ և այլն: Դրանք տեղադրված են ֆեյսբուքի տարեգրքում  https://web.facebook.com/profile.php?id=100003527880221  և   <<Իմ հեքիաթները և մանկական բանաստեղծությունները>>  ՖԲ  հեղինակային  էջում`  https://web.facebook.com163910983765970/ : Նրա մանկական հեքիաթներն ու բանաստեղծությունները հրապարակվում են Tzuk.am, Մանուկության մոլորակ, Մանուկների աշխարհում, Մանկական բանաստեղծություններ, Պարտեզ ֆեյսբուքյան խմբերի էջերում ու դրվատանքի արժանանում: Դրանք ունեն դաստիարակչական, ուսուցողական ու ճանաչողական նշանակություն և ստեղծված են  բացառապես ներկա կենցաղավարության միջավայրը արտացոլող գործողություններով ու մարդկային հարաբերություններով: <<Խոսող գաթաները>> հեքիաթի մոտիվներով գրել է երեք գործողությամբ տիկնիկային պիես, որտեղ կան բազմաթիվ չափածո հատվածներ և կարող են բեմադրության դեպքում ներկայացվել որպես երաժշտական մասեր ու երգեր: Տպագրության են պատրաստ մանկական բանաստեղծությունների ու մանրապատումների ժողովածուները: 2020 թ. սեպտեմբերին «Արմավ» հրատարակչությունը լույս է ընծայել ԶԵՄՖԻՐԱ ՍԱՐԳՍՅԱՆԻ «ԱՆԿԱՏԱՐ ԽՈՍՏՈՒՄ» գիրքը։ Գրքում ընդգրկված են վիպակներ, պատմվածքներ և իրապատումներ։