2011թ դեկտեմբերի 2-ին թվականին վերաբացվեց Ջերմուկ համայնքի կենտրոնական գրադարանը:  Ջերմուկի քաղաքապետարանի  որոշմամբ 3 գրադարանները միավորվեցին և արդյունքում ստեղծվեց մեկը: Շինարարական աշխատանքների համար ՀՀ կառավարությունից հատկացվել է 28 մլն դրամ: Գրադարանի նոր գույքի համար իր աջակցությունն է ցուցաբերել Ջերմուկի քաղաքապետարանը: Կահավորման, համակարգիչների և հարակից սարքավորումների համար համայնքային բյուջեից ծախսված գումարը, նոր գրականության հետ կազմել է մոտ 4,5 մլն դրամ: Այստեղ երեխաները գալիս են մեծ հետաքրքրությամբ, քանի որ գրքերի մեծ մասը նոր են, իսկ պայմանները` տրամադրող: «Նույնիսկ միանգամից մի քանի գիրք են վերցնում, կամ օրվա մեջ մի քանի անգամ գալիս»,-նշում է գրադարանի աշխատակից Ռոզա Ավագյանը` ավելացնելով, որ երեխաների ոգևորությունն ու խանդավառությունը մեծ է հատկապես նորացված, մանակական թարմ գրականության շնորհիվ:
Գրադարանի կահավորումից բացի Ջերմուկի քաղաքապետարանը հոգ է տարել, որպեսզի հատկապես ընթերցասեր երեխաները հաճույքով այցելեն նորաբաց գրադարան: Ձեռք է բերվել մոտ 1 մլն դրամ արժողությանմբ մեծաքանակ մանկական գրականություն: 
Ի դեպ, հաճելի զուգադիպությամբ իրադարձությունը համընկնում է հայ գրերի տպագրության 500- ամյակի տոնակատարությանը, որը հպարտությամբ նշում են աշխարհի բոլոր հայերը: 
Գրադարանն աշխատում է առանց հանգստյան օրերի, ժամը 11:00-ից մինչև 18:00-ն: Սպասարկումն անվճար է և երեխան կարող է օգտվել նախկին համակարգի նման` մեկ անգամ բացելով իր անվանական քարտը: Այս ամենին ավելացել է նաև համակարգչային նորարական մոտեցումը, ինչի շնորհիվ ընթերցողները, աշխատակիցների օգնությամբ, կարող են օգտվել նաև մասնագիտական, գիտական կայքերից և համացանցով գտնել անհրաժեշտ այն գրքերը, որոնք չկան համայնքի գրադարանում: