Ծնվել Է 1940 թվականին Արտաշատի շրջանի Այգեստան գյուղում: Ավարտել է Երևանի Խ.Աբովյանի անվան պետական մանկավարժական ինստիտուտի նկարչության ֆակուլտետը: 25 տարի աշխատել է Երևանի Ակսել Բակունցի անվան մանկավարժական ուսումնարանում որպես նկարչության, ծեփի և արվեստի պատմության ուսուցչուհի: 4 տարի աշխատել է Երևանի մշակույթի համալսարանում: 2006 — 2013 թ.թ. աշխատել է Ջերմուկի թիվ 1 արվեստի մանկական դպրոցում: Միևնույն ժամանակ հանրակրթական դպրոցում վարել է նախադպրոցական երեխաների նկարչական խմբակի պարապմունքները: 2010 թ.-ից սկսել է գրել պատմվածքներ և բանաստեղծություններ ինչպես երեխաների, այնպես էլ մեծահասակների համար: Տպագրվել է մի շարք թերթերում և ամսագրերում: Վերջերս լույս տեսավ նրա մանկական բանաստեղծությունների առաջին ժողովածուն՝ <<Ատամհատիկ>>-ը: Գրքում ներկայացված ստեղծագործությունները գրված են երեխաների համար մատչելի ու գրավիչ բառապաշարով, նրանց նկատմամբ անհուն սիրով ու բարությամբ, օգնում են ճանաչել շրջակա աշխարհը, կենդանիներն ու բույսերը անձնավորված են, արժանանում են հոգատար վերաբերմունքի, ապրում՝ մարդկային կյանքով ու առօրյայով: Կանխատեսելով երեխաների հարցասիրությունը՝ հեղինակը գրքում զետեղել է համառոտ տվյալներ բանաստեղծությունների հերոսների՝ կենդանիների, միջատների ու թռչունների մասին: Տիկին Մ. Սահակյանը տպագրության է նախապատրաստում իր հաջորդ գիրքը, որի հասցեատերերը կլինեն ավագ ընթերցողները: