Հայկ Ալեքսանի Ավագյանը ծնվել է 1927 թ.  Վայոց Ձոր մարզի Գետափ գյուղում: 1951 թ.  ավարտել է մայրաքաղաքի էներգետիկ տեխնիկումը, գործուղվել Ջերմուկ, մասնակցել Ջերմուկ մայր գործարանի և հիդրոէլեկտրակայանի կառուցմանն ու շահագործմանը: Մեկ տասնամայակ, որպես բաժնի վարիչ և ՀՀԳ-ի հատուկ թղթակից, աշխատել է Վայքի և Եղեգնաձորի շրջանային թերթերի խմբագրություններում: 1959-63 թ.թ.  հեռակա կարգով Մոսկվայում ստացել է ժուռնալիստական բարձրագույն կրթություն: Երկար տարիներ մամուլում տպագրվել են  Ավագյանի ակնարկները, երգիծական հոդվածներն ու ֆելիետոնները: Հայկ Ավագյանը գրչի ու գրականության մարդ էր,  լայն հետաքրքրությունների տեր մտավորական,  բանահավաք-հրապարակախոս, որի հաստատումն է ընթերցողի սեղանին դրված, առ այսօր ջերմ ընդունելության արժանացած  գեղարվեստական և պատմագրական    գրքերը : <<Գետափ>>  (2005թ.) գիրքը  պատմական և ժողովրդագրական ակնարկ է  Վայոց ձորի հնագույն բնակավայրերից մեկի՝ Գետափ գյուղի մասին: Հեղինակը կիսվել է  իր ծննդավայրի  մասին  պատմող հիշողություններով: <<Կեչուտ>>  (2015թ.) գրքում զետեղված է  Կեչուտ գյուղական բնակավայրի հազարամյա տարեգրությունը: Վավերագրական ակնարկների ժողովածու  է   <<Անմահները հրամայում են>>  գիրքը (2015 թ.).  պատերազմ, մարդիկ, ճակատագրեր: <<Հայոց տան մեծերը>>  (2010 թ.)  գիրքը հավաքված պատառիկներից հուշագրության մի զամբյուղ  է՝ հայոց տան երևելիների աստղաբույլի մասին: Ճիշտ այնպես, ինչպես նրանք եղել են իրենց կյանքի ու հայրենանվեր գործունեության աստծո պարգևած ժամանակի մեջ: Հ. Ա. Ավագյանը մահացել է 2016 թ.: