Ջերմուկի քաղաքային գրադարանում տեղի ունեցավ Վարդգես Դավթյանի և Անի Փաշայանի «Առնետի դարի մայրամուտը» համահեղինակային գրքի լուսաբանումը,  որին ներկա էին Վայոց Ձորի մարզային գրադարանի տնօրեն Արփինե Ավագյանը, հայոց լեզվի և գրականության ուսուցչուհիներ, ստեղծագործող հեղինակներ և ակտիվ ընթերցողներ: 

Գրադարանի տնօրենը հանդես եկավ բացման խոսքով. «Մեզ համար մեծ պատիվ է գրադարանում մեծարգո հյուրերի ընդունելը։ Շնորհավորելով այս գրքի ծնունդը, նշեմ, որ սա շատ լավ առիթ է ծանոթանալու արտերկրում բնակվոր հայազգի գրողներից մեկի՝ հոգեբույժ․ գրող, բանասիրական գիտությունների թեկնածու, գիտական, գիտահանրամատչելի, գեղարվեստական և հրապարակախոսական բազմաթիվ գրքերի հեղինակ Վարդգես Դավթյանի ստեղծագործական վաստակին։ Նրա և գրականագետ-գրաքննադատ, բանասիրական գիտությունների թեկնածու, խմբագիր, Հայ-ռռւսական համալսարանի հայագիտության ամբիոնի վարիչ Անի Փաշայանի հետ կայացած զրույցները ընթերցվում են առանձնահատուկ հետաքրքրությամբ, քանի որ դրանք ընթանում են գրականության, մտավորականի, մասնավորապես գրողի կերպարի և բնավորության առանձնահատկությունների, գրական երկերի հոգեբանական առանցքների շուրջ»։ Այնուհետև տիկին Անի Փաշայանը ներկայացրեց գիրքը, գրքի կառուցվածքը, արժանիքները, ոճը և այլն։

Գրքի լուսաբանումից հետո ստեղծվեց ջերմ զրույց ներկաների և Անի Փաշայանի միջև: Սկսնակ ստեղծագործողներից Վարդուհի Բագրատյանը արտահայտեց իր հիացմունքը Վարդգես Դավթյանի գրքերի վերաբերյալ, որոնք նա ընթերցել էր վերջին շաբաթներին։ Դրվատանքի խոսքերով ներկայացավ Ջերմուկի կրթահամալիրի ուսուցչուհի Ալիսա Ամիրջանյանը։ Գրականության, գրականագիտության ու գրաքննադատության վերաբերյալ բազմաթիվ հարցեր ուներ գրադարանի ակտիվ ընթերցող, մասնագիտությամբ ռադիոֆիզիկ, նաև գրական առաջին քայլերն անող Առաքել Առաքելյանը: Այդ հարցերի շուրջ հետաքրքիր քննարկում ծավալվեց նրա և տիկին Փաշայանի միջև։

Միջոցառման ավարտին Ալիսա Ամիրջանյանը իր հեղինակային «Ընդամենը հարյուր...» պատմվածքների և մանրապատումների վերջերս լույս տեսած գրքերը նվիրեց հյուրերին: