Ամեն տարի ապրիլի 2-ը նշվում է որպես մանկական գրքի միջազգային օր, որին հաջորդում է մանկական գրքի շաբաթը։ Այդ առիթով այսօր քաղաքային գրադարան էինք հրավիրել Ջերմուկի Մաքսիմ Գորկու անվան դպրոցի 2-րդ դասարանի աշակերտներին` դասվար Մելանյա Գրիգորյանի և ծնողների ուղեկցությամբ: Գրադարանի աշխատակից Ռոզա Ավագյանը ներկաներին հակիրճ ներկայացրեց Անդերսենի կյանքը և նրա հրաշալի հեքիաթները։ Այնուհետև ստեղծվեց ջերմ զրույց գրադարանի տնօրենի և երեխաների միջև: Այստեղ տնօրեն Զեմֆիրա Սարգսյանը հանդես եկավ որպես մանկագիր և երեխաներին ներկայացրեց իր մանկական բանաստեղծությունների և հեքիաթների գրքերը: Պատմեց, թե ինչպես են ստեղծվել իր հեքիաթները: Նեկայացնելով հեքիաթները՝ երեխաներին բացատրեց դրանց ճանաչողական, ուսուցողական և դաստիարակչական իմաստը: Նրանցից շատերը կարդացել էին և կիսվեցին իրենց տպավորություններով: Տիկին Սարգսյանը ընթերցեց իր բանաստեղծություններից մի քնիսը․ <<Մարիան ու Աննան>>, <<Ես, ամառը, Ջերմուկը>>, <<Փնթի, ծույլիկ Սենիկ ու Բենիկ>>, «Դպրոցից տուն եկան երկու քույրեր» և այլն։ Յուրաքանչյուր ընթերցումից հետո երեխաները մեծ ոգևորությամբ մեկնաբանում էին, թե ինչ է սովորեցնում տվյալ բանաստեղծությունը: Այնուհետև նրանք հանդես եկան իրենց գեղեցիկ երգով: Հանդիպումն ացավ ջերմ մթոլորտում: Երեխաները ծանոթացան նաև գրադարանից օգտվելու կանոններին և գրադարանային հավաքածուին: Նրանցից շատերը գրանցվեցին ու դարձան գրադարանի ընթերցողներ: Պարզվեց, որ այդ դասարանում սովորողներից մի քանիսը ավելի վաղ են դարձել գրադարանի ընթերցողներ և կարդացել են բազմաթիվ գրքեր։ Նրանցից երկուսին տիկին Սարգսյանը նվիրեց վերջերս լույս տեսած «Շուտ մեծանամ» մանկական բանաստեղծությունների երկլեզու (հայերեն-ռուսերեն) գիրքը։ Տիկին Մելանյա Գրիգորյանը և ծնողները շնորհակալություն հայտնեցին բացառիկ հանդիպման համար և նշեցին, թե որքան կարևոր է գրադարանի դերը երեխաների կյանքում: