Այսօր գիրք նվիրելու օրն է: Տոնական բարձր տրամադրությամբ գրադարանում էին Ջերմուկի Մաքսիմ Գորկու անվան դպրոցի 3-րդ դասարանի աշակերտները ՝ դասվար Մ. Գրիգորյանի ուղեկցությամբ: Միջոցառմանը ներկա էին ուսուցչուհիներ, ծնողներ և գրադարանի կրտսեր տարիքի ակտիվ ընթերցողներ: Նրանց ջերմորեն ողջունելով՝ գրադարանի օպերատոր Ռոզա Ավագյանն անդրադարձավ օրվա խորհրդին, աշակերտներին ներկայացրեց Հ. Թումանյանին որպես ամենագրքասեր բանաստեղծ, ում ծննդյան օրն էլ 2008 թվականից Հայաստանում նշվում է որպես Գիրք նվիրելու օր: Նա ջերմ շնորհակալական խոսքեր հղեց տիկին Մ.Գրիգորյանին՝ գրադարանի հետ մշտական համագործակցություն ունենալու և երեխաների մեջ դեռ կրտսեր տարիքից գրքի և ընթերցանության հանդեպ սեր արթնացնելու համար: Իր առաքելությանը նվիրյալ ուսուցչուհին մեծ սիրով է տարիներ շարունակ երեխաներին փոխանցում իր հոգու ջերմությունը, կրթում ու դաստիարակում նրանց :

Միջոցառումն սկսվեց Թումանյանի «Շունն ու կատուն» բալլադի բեմադրությամբ: Աշակերտներն այն ներկայացրեցին երաժշտական նորովի ու ժամանակակից լուծումներով: Հեքիաթն ավարտվեց բարի վերջաբանով: Նրանք հանդես եկան երգ ու պարով և, քանի որ հեքիաթները միշտ բարի ավարտ են ունենում,կատարեցին Լիդուշիկի «Բարի օր» երգը: Այնուհետև աշակերտները հանդես եկան հեքիաթներից ստացած ազնվության, աշխատասիրության, բարին գործելու ցանկության ամենաանկեղծ պատկերացումներով:

Միջոցառման ավարտին գրադարանի ակտիվ ըթերցողները ներկայացրեցին Թումանյանի քառյակները և բանաստեղծությունները, երգեցին Միլենան և Հեկտորը: Գրադարանավարուհի Հասմիկ Սահակյանը ընթերցեց գրադարանի տնօրեն Զեմֆիրա Սարգսյանի տարիներ առաջ՝ 1969 թվականին գրած ակրոստիկոսը՝ նվիրված Հովհ. Թումանյանի հարյուրամյակին։

Գրքի տոնին գրադարանը հյուրընկալել էր նաև Կեչուտի դպրոցի 1-ին դասարանի ուսուցչուհի Գ. Բալյանին և օտար լեզվի ուսուցչուհի Մ. Ստեփանյանին՝ իրենց երեխաներով հանդերձ. չնայած նրանք տառերը ամբողջությամբ դեռ չեն սովորել, բայց համարվում են փոքրիկ ընթերցողներ: Ջերմ ու բարի մթնոլորտում հյուրերը կիսվեցին սեփական կարծիքներով և խոստացան հաճախակի մեզ հյուր գալ:

Բոլոր երեխաները մեծ տպավորություն ստացան միջոցառումից և գրադարանի կողմից որպես նվեր ստացան Զ. Սարգսյանի «Շուտ մեծանամ» և Մ. Սահակյանի «Տիեզերքը հավքի թևին» մանկական բանաստեղծությունների գրքերը:

Շնորհակալություն ենք հայտնում Ջերմուկի թիվ 3 միջնակարգ դպրոցի 6-րդ դասարանի աշակերտ, գրադարանի ակտիվ ընթերցող Վահրամ Պողոսյանին, ուսուցչուհի Մերի Ստեփանյանին և Ձախափի կրթահամալիրի մաթեմատիկայի ուսուցչուհի Գ. Հովսեփյանին՝ գրադարանին գրքեր նվիրելու համար: