Այսօր գրադարան այցելեցին Ջերմուկի կրթահամալիրի 6-րդ դասարանի աշակերտները դասղեկ Շուշան Հարությունյանի ուղեկցությամբ:

Բաց դասի շրջանակում նրանք քննարկեցին մեծանուն գրող Մուշեղ Գալշոյանի «Ձորի Միրոն» վիպակը :

Միրոյի գիտակցության մեջ խորը նստած են Մեծ Եղեռնի հետ կապված դեպքերը: Ընտանիքի և հարազատների անդառնալի կորուստը դարձել է նրա մշտական տխրության պատճառ, սակայն նա չէր կորցրել նորից արմատներ գցելու հույսը: Աշակերտները ուսուցչուհու օգնությամբ գունագեղ բառապաշարով ներկայացրեցին վիպակի գաղափարական բովանդակությունը:

Այնուհետև նրանք դերային կերպարներով ներկայացրեցին «Կռունկ» պատմվածքը, որտեղ Գալշոյանը մեծ հուզականությամբ է կերտել Կոմիտասի սքանչելի կերպարը: Հայի բառ ու խոսքին անծանոթ օտարուհին, լսելով Կոմիտասի «Կռունկը», հուզվում է.

«Դա ի˜նչ երաժշտություն էր... ի˜նչ ձայն... ես երբեք չպիտի մոռանամ... չպիտի մոռանամ...»:

Վարդապետի շուրթերով խոսում էր անպաշտպան, բնաջնջվող մի ողջ ժողովուրդ: Նրա երգը տարագիր հայի հոգու երգն էր, հայրենիքի կարոտի կանչը, բողոքն ընդդեմ անարդար աշխարհի:

Աշակերտներն ասմունքեցին նաև Պ. Սևակի «Անլռելի զանգակատուն» պոեմից հատվածներ: Կարինան և Աննան կատարեցին «Կռունկ» երգը:

Գրադարանի աշխատակիցները շնորհակալություն հայտնեցին Շուշան Հարությունյանին` աշակերտներին հարուստ գիտելիքներով զինելու և նրանց մեջ ընթերցանությունը խորացնելու համար:

- Այս դասարանի աշակերտների հիմնական մասը մեր գրադարանի ընթերցողներն են և դա հենց այնպես չէ: Խստապահանջ, նվիրական և սրտացավ աշխատանքը տալիս է իր պտուղները: Այսօր մենք հիացանք աշակերտների խոսքով և մտածողությամբ,- նշեց գրադարանավար Հասմիկ Սահակյանը: